انتشر في الآونة الأخيرة مقاطع غنائية لأحد الشباب يُدعى أحمد الديب، والتي أثارت ضجة كبيرة بين نشطاء مواقع التواصل الاجتماعي «فيسبوك» و«تويتر».
وعلى مدار الأيام الماضية، أصبح أحمد الديب حديث مواقع التواصل، ليتحول إلى مادة للسخرية بالكوميكس والفيديوهات الساخرة على السوشيال ميديا، وذلك بعد تجاوز مشاهدته حاجز المليون مشاهدة.

أسرار أحمد الديب
وفقًا لما ذكره أحد أقارب أحمد الديب في تدوينات على موقع التواصل الاجتماعي «فيسبوك»، فإن أحمد الديب يبلغ من العمر 32 عامًا ومتزوج ولديه 3 أبناء، ويقيم في مركز ميت غمر التابع لمحافظة الدقهلية.
يعمل أحمد الديب عامل في مستشفى ميت غمر المركزي، حيث تم تعيينه تحت قانون الـ 5 % لذوي الاحتياجات الخاصة، والذي يكفل لذوي الاحتياجات الخاصة حق العمل والسكن.

حالة إنسانية
كشف أحد النشطاء على موقع التواصل الاجتماعي «فيسبوك» ويُدعى «أحمد محسن»، حقيقة أحمد الديب، مؤكدًا أنه متأخر عقليًا، على حد تعبيره.
وكتب المدون أحمد محسن على حسابه بموقع التواصل الاجتماعي «فيسبوك»: «حالة إنسانية، النهاردة عايز اتكلم عن حاجة مختلفة شوية، وممكن يكون موضوع صادم لبعض الناس، اللي في الصورة ده شاب بينضحك على أداءه كتير في أغنية منتشرة اليومين دول اسمها (ريريري.. ايأ ايأ.. زكي يازكي) اتعمل عليه كوميكسات تريقة في اكبر الصفحات.. ومقاطع من أكبر مشاهير الفيديوهات.. وكمان فيه فيديوهات تقليد عليه عدت المليون مشاهدة».

وتابع:«للأسف بيتم استغلال إعاقته من متعهدين الأفراح الشعبية.. وعلموه من فترة يطبل وحفظوه شوية أغاني، مأساة الشاب ده دلوقتي ان بسبب إعاقته متعهدين الأفراح دول بيفوتوا عليه في البيت وياخدوه معاهم أفراح هم متفقين عليها.. بالنصب وبالاستغلال لحالته، ده طبعا عشان يضحكوا عليه الناس، ويستغلوه بالشكل اللي انتم بتشفوه.. ومش هتلاقوا له فيديو واحد وهو بيتكلم طبيعي من مئات الفيديوهات له على اليوتيوب.. وطلع في الفيديو ده قال إن متعهدين أفراح منهم بتسرق منه فلوسه اللي هي 15 جنيه».

واستطرد: «طبعا فيه قوانين كتير لتجريم استغلال الشخص المتأخر أو المعاق.. لكن الله اعلم محدش بيطبقها في حالة واضحة وضوح الشمس زي دي ليه، وأصحاب الأفراح اللي زي دي بيرضوها ازاي ؟!اللي خلاني اكتب بوست زي ده لما عرفت ان عنده (3 أطفال أصحاء).. ومسيرهم يوم يشوفوا أبوهم في وضع زي ده.. ويعرفوا أن كان فيه ناس بتستغله ويخلوا الدنيا كلها تضحك على إعاقته وهو لا حول له ولا قوة».

وأردف: «كل اللي بتمناه أن (جهة رعاية نفسية وعقلية) تتبنى حالته؛ لأن الصراحة وسط المشاهدات المليونية لفيديوهاته وكوميكسات التريقة عليه.. بياخد كمية شتايم ودعاوي من الناس يشيب لها الولدان.. وهو طبعا معندوش مقدرة الرد عليهم، فياريت نعمل ثواب ونشارك حالته او نعمل اشارة لمسئول.. لعل حد يتكفل بيه ويحميه من اللي بيحصله».