تطورت السينما المصرية في السنوات الاخيرة بشكل كبير، ولكن تظل هناك العديد من المشاهد لا يمكن نسينها ابدا، يعرض “مباشر 24” في هذا التقرير بعض تلك المشاهد.
5- فيلم الكيف انتاج 1985
في مشهد جمع بين الفنان يحيى الفخرانى والفنان جميل راتب..
جميل راتب: أنا عشت حيـاتي كلها تاجر كيوف، ابتديتها بالشاي والبن والدخـان، الكيف شهوة، والشهوة هي اللي بتشد القرش من جيوب الناس.
يحيى الفخرانى: انت شيطـان
جميل راتب: النـاس هم اللي مغفلين، وفي شهوتهم غرقانين، واللي يقف ع البـر ما يغرقش، إحنا ماضربناش حد على إيده، اللي بيحبنـا هو اللي بيرمي روحه في حضننا، زمــان كنت بغش الشاي بنشـارة خشب وابيعه في بواكي شكلهـا حلو، مكتوب عليها شاي “أبو الأصـول” كسبت والمـاركة بقالها اسم وسمعت وفجـأة النشـارة غليت والنجارين اتملعنوا عبينـا الشاي من غير نشـارة تعرف حصـل إيه؟! اتخرب بيتي وفلست، الزبـاين طفشت وقالوا عليـا غشيت الشاي، مش بقولك مغفليـن!
يحيى الفخرانى: هم مش مغفلين، اللي زيك اللي فسدوا ذوقهم، عودتوهم على الوحش لغاية ما نسيوا طعم الحلو.
4- فيلم جري الوحوش انتاج 1987
مشهد جمع بين بين الفنان الراحل حسين الشربيني والفنان الراحل نور الشريف
– محدش رزقه بيزيد ولا بينقص عن حد
– ازاى بقى؟
– “وان تعدوا نعمة الله لا تحصوها” نعم ربنا علينا كتير وكلها ارزاق متقسمة بعدل وحكمة، بص لنفسك وراجع حسبتك هتلاقى نفسك واخد حقك بالكامل.
– واخد حقى بالكامل؟!
– ايوة لو فرضنا ان نعم ربنا اللى ملهاش عدد تساوى 24 قيراط ، هتلاقى كل انسان واخد الاربعة وعشرين قيراط كاملين بس واخدهم مشكلين.
– مشكلين ازاى؟!
– تلاقى اللى واخد عشر قراريط مال على 7 صحة على زائد زوجة صالحة على اتنين علم واربعة راحة بال، يبقوا كام؟
– يبقوا اربعة وعشرين
– وتلاقى واحد غيرهم واخدهم 15 بنون على اتنين مال وواحد صحة و…..
– ليه ربنا موزعش نعمه كلها على الناس كلها؟! عشان ميبقاش فى حد محروم من نعمة بيتمتع بيها غيره.
– “لو بسط الله الرزق لعباده لبغوا فى الارض” حكمته كدة يا اخى.
– يعنى مسعاش؟
– اسعى فليس للانسان الا ما سعى.
https://www.youtube.com/watch?v=mUTRXef3J8g
3- فيلم الكيت كات انتاج 1991
مشهد جمع بين الشيخ حسنى “الفنان محمود عبد العزيز” وعم مجآهد “الفنان أحمد سآمى عبد الله”.
صباح الخير يا عم مجاهد..
ايه.. انت لسه زعلان منى! يا عم مجاهد انت ظالمنى ورحمه ابويا انت ظالمنى!
انت عارف المعلم عطيه كان بيدفع ايجار للقهوه كام كل شهر؟ خمسه جنيه و ستين قرش وايجار الشقه كان بيروح للمياه.. والمرتب عملت توكيل لأمى تقبضه كل أول شهر عشان مصروف البيت..
بتكلمنى عن إيه.. عن الحشيش! الحشيش ده هو الذنب الوحيد اللى فى حياتى.. بعد ما ماتت ام يوسف.. مكنش عندى حتى بنى ادم اكلمه.. انا بكلم الناس حوالين الجوزه.. بفضفض بضحك واغنى فى قعده حلوه لغايه ما اموت.. بيت إيه اللى انت بنيته مع ابويا طوبه طوبه.. كنت فين انت ياعم مجاهد.. قدرت تعمل ايه! لما مرات ابويا خدت الشقه وادتها لولادها! ها! عملت ايه!
الحكايه مش حكايه البيت ياعم مجاهد.. المشكلة مشكلة الناس اللى عايشه ولازم تعيش
متظلمنيش يا عم مجاهد.. لا مؤاخذه يعنى مغرفه الفول اللى كانت بمليم.. بقت بنص ريال..
2- فيلم “انا اللي قتلت الحنش” انتاج ١٩٨٤
مشهد جمع بين الزعيم عادل امام والفنان سعيد صالح والفنان احمد راتب..
عادل امام: انا قلت المركب دي متنزلش البحر، الموتور محتاج عَمرهْ.
سعيد صالح: عَمرهْ.. هنفضل اسبوع متعطلين؟ والعالم الغلابه دول يعملوا ايه طول الاسبوع، يقعدوا يتشمسوا!
عادل امام: مش احسن ما البحر يبلعهم؟
احمد راتب: لحد امتي هنفضل عايشين في الغلب دا! لو تفتحوا مخكوا ونهج على اليونان زي ما عملوا الصيادين بتوع عزبه البرج.
عادل امام: بعد ما كان الاجريج بيجوا يسترزقوا هنا نروح احنا نسترزق عندهم!
احمد راتب: كل وقت ولي اذان يا حسانين، دا الواد مخيالي ابن استاولو البقال لما رجع اليونان بعتلى جواب بيحكي ويتحاكي عن الخير اللي في بلادهم.
عادل امام: ما الخير ف بلدنا كتير، ايه اللي يجبرك تتغرب وتتبهدل؟
احمد راتب: بس الخير كله فى كرش الحنش.
عادل امام: وانت تسيب الحنش ياكل الخير كله ليه؟
احمد راتب: حكم القوى على الضعيف.
عادل امام: انتوا اللي قوتوا علينا.
احمد راتب: طب الحل ايه يا حسانين؟
عادل امام: نفسي اشوف راجل فى البلد دي يقول للحنش لا!
https://www.youtube.com/watch?v=3iyLxJq0lBU
1- فيلم الارهاب والكباب انتاج 1992
مشهد للزعيم عادل امام في اتوبيس نقل عام.
– طب مفيش حاجة هترخص؟
– حاجات كتير هترخص وهتبقي بسعر التراب، انا وانت والأستاذ وحضراتكم اجمعين. وسع يا سيدي، وسع يا أخويا، عن اذنك يا مدام، يا مدام مابيقفوش بالعرض كده في الأتوبيس وخصوصاً الستات، الوقوف يا مدام لازم يبقى بالورب..
يا سلام عجبتكم الهيافه اوى – اه – ولو في حاجة جد يبقي بوزكم شبرين، جتكم البلا فيكم وفي أشكالكم، يا بتوع معلش يابتوع مسيرها تفرج.
دي أزايز القازوزة واقفة مترصصة فى صناديقها ومستريحة عنكم، ولو حد ضغط عليها تفرقع، يا جُبنا يا اللي صوتكم مايعلاش إلا في الفارغة، خليكم فى اللي انتم فيه.
ربوا العيال، وروقوا نفسكم ليلة الخميس، ويوم الجمعة اتوضوا وروحوا صلوا، وكفايه عليكم دعا ورا الإمام.
في مشاهد كتير لا يمكن نسيان تفاصيلها، قولنا ايه اكتر مشهد في السينما المصرية عمرك ما تنسى تفاصيله؟